نصائح لاى مامى جديدة

بواسطة: كُتاب بيت العز - آخر تحديث: 9 أكتوبر 2019
نصائح لاى مامى جديدة



اي ام لسه والده بقالها ١٥ يوم، او هتولد ان شاء الله قريب ..
أول 3-4 شهور ماتقلقيش من الحاجات دى

1-الخنفرة طالما الطفل بيرضع و ينام كويس : سببها ضيق تجويف الانف بنستخدملها محلول ملح

2-الحزق:مالهوش اى دلالة مرضية طالما مفيش اعراض تانية

3-الإرتجاع:طالما الطفل بيزيد فالوزن و صدره مش بيتعب باستمرار

4-زيادة عدد مرات الستول بعد كل رضعة او بمجرد بدء الرضاعة الطفل يعمل غازات و ستول يعنى ممكن يوصل ل من 8 ل 12 مرة يوميا و تكون الشكوى المعتادة ان الطفل بيسهل
ده مش اسهال ده حاجة اسمها Gastro-colic reflex بمعنى ان دخول اللبن للمعدة بيحفز القولون للتفريغ

5-الإمساك:لحد 5 أو 7 ايام عادى طالما بيعمل براز لين وده خاصة بعد 45 يوم

6-تورم الثديين سواء عند الذكور او الاناث ده نتيجة هرمونات من الام و بيتحسن لوحده و بلاش تعصير عشان ده هيعمل خراج للطفل سيبوه فى حاله

7-افرازات من المهبل عند الاناث سواء افرازات بيضاء او حتى نقط دم ده برضه نتيجة هرمونات الام اللى بتقل بعد الولادة عند الطفل و بتسبب كده غالبا فى الاسبوع الاول و مش محتاجين اى حاجة بتقف لوحدها

8-لون برتقالى ممكن نلاقيه فى البامبرز فى الايام الاولى بعد الولادة دى املاح يورات بتنزل فى البول خاصة لو الجو حر و الطفل مبيرضعش كويس كل المطلوب نشغل التكييف على 28 و يرضع كويس

9-الزغطة:حاجة طبيعية بنشوفها فى معظم الاطفال خاصة فى اول شهر و احيانا بتتكرر كتير و خاصة لما الطفل بيرضع كويس نتيجة امتلاء المعدة و الضغط على الحجاب الحاجز

10- قشرة الشعر او قبعة المهد Seborrheic dermatitis ووقوع الشعر ده طبيعى و الله منقلقش و مش محتاجين علاج و عموما مفيش كلام عن شعر الطفل قبل سنتين

11-المغص:طبيعى فى اول 4 شهور ممكن العياط يكون 3 ساعات على مدار اليوم كله

12- الخضة فى اول 3 شهور سواء عند سماع اصوات عالية او احيانا عند لمس الطفل او ممكن لوحده دى حاجة اسمها Startle reflex و بيتحسن لما الجهاز العصبى ينضج عند من 4 ل5 شهور

13-الحول فى اول 6 شهور غالبا نتيجة ضعف فى عضلات العين بيتحسن لوحده مع الوقت خاصة لو عند تحريك العين لاتجاهات معينة مش دائم

14-السرة مش لازم تقع فى اول اسبوع عادى لو اتأخرت اسبوعين تلاتة و لحد 45 يوم اكتر من كده لازم فحص لاستبعاد مرض مناعى نادر

15-افرازات العين و زيادة الدموع و سيلانها من الحاجات المشهورة فى الاطفال اول 6 شهور نتيجة ضيق القنوات الدمعية كل المطلوب الصبر و عمل مساج للقنوات الدمعية على جانبى الانف من اعلى الى اسفل بلطف من 2-3 مرات يوميا و لمدة شهرين او اكتر و تنظيف الافرازات باستمرار بمناديل مبللة بماء فاتر و فى حالة وجود عدوى ميكروبية فى صورة افرازات صديدية بيضاء و احمرار و تورم بالعين تستخدم مضادات حيوية موضعية (قطرة او مرهم) بعد استشارة الطبيب و لحسن الحظ 90% من الحالات بتشفى تلقائيا قبل اتمام عام و لو استمر الضيق او الانسداد بعد عام يتم العرض على طبيب الرمد لاحتمال الحاجة الى اجراء توسيع للقنوات الدمعيهل ?

اوعى تنسى كمان
اول ٣ ايام او ٥ ايام لغاية ما الام ربنا يرزقها بحليب فى الثدى
بيكون اغلب بكاء الطفل سببه الجوع
و عشان كده العلاج الوحيد هو الرضاعه و من هنا بقول لكل ام » حتى لو لبنك اتأخر » حطى طفلك على ثديك و متزهقيش » اعملى اللى عليكى و ربنا هو اللى بيرزق » عليكى بشرب سوائل كتير و الحلبه اكتر من تورمس – كلنا عارفينه – و نص كيلو لبن طبيعى على الاقل و الماء بكثره و اكل الخضار الورقى – إما عشان ميجيلهاش امساك او عشان مدرات اللبن زى الجرجير و البقدونس.

لو اللبن قليل « اللى هو السرسوب » مفيش مشكله – المهم الام تعمل اللى عليها ✋
ترضع كل نص ساعه ان امكن – و هى قاعده فى اكتر وضعيه مريحاها

لكن الامهات اللى بتقول معنديش نَفس و مش قادره او مبحبش الالبان و لا جايلى نفس »
كدا يبقى مشكله المشاكل ?
? الطفل المفروض يرضع حلييب – مش اعشاب و جلوكوز و الكلام دا !!
اصح كلام اتعلمناه : بعد ما الأم تفوق من البنج تحاول تقوم تلامس الطفل مع صدرها و تبتدى ترضع حتى لو مفيش حاجه بتنزل » المهم يحصل التلامس لان بعض الامهات بتكون خايفه.

✋ اوعي تخافى او تزهقى » انتى كويسه و زى الفل ان شاء الله » و طفلك دا ملوش بعد ربنا غيرك – و تعملى حسابك – لبنك كتير او قليل مش مشكلتك – خفيف او تقيل مش شغلتك

?شغلانتك كـ ام » انك ترضعي فى اول ١٠ ايام بانتظام فى المواعيد كل ساعه او اتنين او تلاته على حسب الطفل، و ممنوع النوم للطفل اكتر من ٣ ساعات عشان ميتعودش على الصيام من بدرى!!
رضعي الطفل على الاقل دقيقتين فى الايام الاولى لان الطفل هينام منك » نلاعب الطفل » و نحاول نصحيه » مره و اتنين » و منزهقش و نجرب تانى و عاشر » ايه المشكله!!

? الاعشاب تتاخد بعد الشهر الرااااااااااااااابع
– ازاي بقه يا دكتور ده اخواته اخدوها من الأسبوع التاني ?

» لأن الأبحاث الحديثه بتقول انها بتعمل قرحه في المعده و تخلي الطفل يرجع و تزود نسبة الصفرا و بتالي نقص في وزن البيبي!! ?

الاهم من دا كله ?
ان الصفرا بتيجى للاطفال فى اول ٣ ايام و بتستمر لغاية اسبوع!!
و علاجها الاول و الاخير هو الرضاعه الكتير و بانتظام » و بنشوفها لما طفل بيدخل الحضانه علشان الصفرا » بيعمل ايه لما بيطلع » بيبقى مفجوع على الرضاعه » و دا المطلوب من كل الأمهات و خصوصا الجداااااااااااااااااد لاول مره

? كمان الرضاعه بدرى ليها فوايد كتيره تانيه.. ، .. ، ..
? بتساعد الام على الراحه النفسيه
? تقليل الالم اللى بييجى للأم فى اول يومين من تكوين الحليب و الشعور بالالم فى الثدى
? تقليل عدد الايام اللى بيكون فيها نزيف مابعد الولاده
? بتساعد جرح القيصريه يقفل بسرعه

اما بالنسبه للأطفال ?
? بتحسن وظائف التنفس عند الطفل
? تظبيط نسبه السكر فى الدم
? النمو عند الاطفال
? لبن السرسوب كويس جدا فى المناعه عند الاطفال حديثى الولاده

? و مننساش انه بيساعد المولود على انه بيطرد البراز الاسود – العقى – من بطن الطفل و بيتدى ينزل الستولز – البراز يعنى – بألوانه المختلفه – اصفر او اخضر – سايل او مخرز – مره فى اليوم – الى ٧ مرات … كل دا طبيعى و مفيش اى قلق ✋

? لكن ضروووووووووووووورى
الطفل فى اول ٣ ايام..
نطمن عليه عند دكتور الاطفال اللى هنتابع معاه » عشان ان شاء الله يشوف لو فيه مشاكل عند الطفل يشوف » الحلق / التنفس / القلب / البطن / الاعضاء التناسليه / فتحة الشرج عشان نطمن.

» نسيت اقول!!
ايه اللى يحصل لو الحليب عند الام اتأخر ?
رجاء بلاش واحده تقولى انا سلفتى ولا اختى عندها بيبى عنده سنه و هترضع البيبى لغاية مينزلى لبن « رجاء بلاش » علشان مش هو دا اللبن اللى الطفل بيحتاجه، كمان ممكن الدنيا دى كلها تعمل تلوث للطفل اللى لسه جاى ✋

? و بعدين لازم نعرف ان البنت اللى بتولد طبيعى ممكن اللبن ينزلها على اليوم الثالت و القيصرى ممكن على الثالث او يتأخر حاجه بسيطه
لكن البكريه ممكن تتأخر شويه و بالتالى هنحتاج ساعتها تدخل بالحليب الصناعى عشان الصفرا بتزيد و دا مينفعش من دماغنا » بمعرفه الدكتور!!

? كل الادويه اللى بتتاخد للطفل لو جه له صفرا فى اول اسبوع
دى تحصيل حاصل و مش هى العلاج
#الرضاعه هى الاساس و ضرورى المتابعه مع الدكتور كل يومين لغاية ما تبقى كل الامور هاديه و مستقره.

? اكرر كلامى!!
الموضوع كله محتاج صبر و سمعان كلام و اجتهاد و توكل على الله – لان الرضاعه دى مش مسأله ام بتحط طفلها على ثديها وخلاص!!
دى مشكله كبيره و لو متعملتش صح و الخسرانين فيها كتير…
? الام لانها هتفقد احساس الامومه و هى بترضع
? الطفل و الغذا الربانى اللى كله مناعه و فوايد
?الاب الغلبان اللى هيتخرب بيت اهله حليب صناعى ?
و انا علشان مشاكل الرضاعه سواء الرضاعه الطبيعى او الصناعى – مغص – ارتجاع – التهابات اذن – عدم انتظام النوم – عصبيه الام و الطفل – ?

? نسيت اقول حاجه!
الرضاعه ملهاش علاقه بحجم الثدى او الحلمه» طالمه مهياش مسح او مقلوبه» ولا بجسم الام» رفيعه او تخينه» دى مسال فرديه
و الام لما بتيجى ترضع طفلها « بلاش نقول الطفل مبيعرفش يمسك على الحلمه » لان الطفل مبيمسكش الحلمه بس – شوفوا الطفل بياخد الحلمه الصناعى كلها فى بوقه قد ايه – نفس الكلام من ثدى الام – الحلمه و التتينه « المنطقه الغامقه ورا الحلمه » لازم تتمسك و تتزق كويس داخل فم الطفل عشان يعرف يمسك كويس و يرضع ان شاء الله.

دُمتم بخير حال ?




178 مشاهدة