محتويات
الحلقـه التاسعـه والعشرون”حوريتي الصغيره”.
بـدأ نادر يقضم أظافـره في توتر أثناء مراقبته لحديث شقيقه بينما تابع هشام بثبـات..
-أول موضوع هو أن رنيم قررت نتجمع كُلنا ونتعشي في قارب في البحر وهنجيب ياسمين معانا ونحاول نصلح ما بينكم واهي تكون فرصه كويس لبدايه جديده بينكم…اما بقا الموضوع التاني هو اننا جايين النهاردا بالليل نشرب معاكم الشاي.
حمزه بمرح:ما انتوا طول الوقت بتيجوا تشربوا الشاي يا صاحبي.
هشام بضحك:لا المرادي مختلف.
حمزه بتفهُم: بمعني!!
هشام مُكملاً:إحنا جايين نطلب إيد آنسه نيره ،لـ نادر.
حمزه بثبات:تنورونـا يا هشام ،هنستناكم.
هشام بنبره مؤكـده:كنت عاوز اطلب منك طلب.
حمزه قاطباً حاجبيه:ايه هو الطلب!
هشام بهدوء:يا ريت نيره ما تعرفش اننا جايين!!
حمزه بإستغراب:أزاي دا!!..وبعدين هي تعرف ان نادر جاي!
هشام بهدوء اكثر:لا متعرفش..بس احنا عاوزين نعملها مُفاجأه ليها.
حمزه بتساؤل: مُفاجأه أزاي!!..افرض ما عجبهاش ورفضته.
هشام بثقه:انا أخويا ما يترفضش يا حمزه بيه.
حمزه بثبات:اممم..دا الموضوع فيه “إن” بقا..بس ماشي مش هقولها أن العريس يبقي نادر.
هشام بسعاده:طيب تمام ،علي ميعادنا بالليل.
“أغلق حمزه الهاتف معـه ثم إنطلق حيث مقر الشركـه لبدأ الاجتماع هنا،بينما تابع نادر لشقيقه في سعاده…
-ميعادنا بالليل مش كدا!!
هشام بضحك:دا إنت واقع خالص.
نادر بهُيام:عارف احساس..انك توعـد وتوفي بوعـدك..حلو اوي الاحساس دا وفي كميه رضا من ربنا مالهاش وصـف،يا بخت اللي يوعـد ويوفي ،احسن من اللي وعد وباع بالرخيص.
رنيم بتدخُل:يعني انت فرحان علشان هتنفذ وعدك ليها وبس!
نادر بثبـات: طبعاً ،علشان لما أنفذ وعدي..هكون بكدا اثبتلها انها إختارت راجل،واني مش عاوز غيرها،ومُكتفي بيها جداً..كفايه فرحتها وقت ما هتشوفني،ساعتها بكبر في نظر نفسي ،قبل ما أكون كبير في نظرها.
رنيم بحنـو:ربنا يتمم علي خير،،ويجعلها نصيبك.
نادر مؤمناً:اللهم اميـن..بس قبل كل حاجه لازم اعمل مُكالمه ومش عاوز اي رد فعل منكم أثناء كلامي.
هشام بإستغراب:هتعمل ايه يا اهبل!!
امســك نادر هاتفه الخـاص ومن ثم اجري إتصالاً سريعاً بها وبعد بضع ثوان أجابت هي بإستغراب…
-السلام عليكم!؟
نادر بهدوء:أزيك يا نيره!!
نيره بغيظ: الحمدلله على كل حال..مش كنا اتفقنا ،ان حضرتك مش هتكلمني غير لما تكون جاهز!!
نادر بحزن مُصطنـع:أنسي اللي انا وعدتك بيه يا نيره،،انا خلاص مسافر وهكمل تعليمي برا.
تجمـدت الدماء في عروقها وقد اغرورقـت عيناها بالدموع وهي تُلقي بجسدها إلي الفراش ومن ثم استجمعت قوتها بصعوبه حيث تابعت..
-تمام.
نادر بنفس الحزن:أشوفك علي خير.
ومـا أن أغلق نادر الهاتف حتي رددت رنيم في غيظ وهي تقترب منه وتوبخـه بعنفوان…
-ايه اللي إنت عملته في البنت دا..حرام عليك!!
هشام ضاحكاً:يخربيت جنانك.. دي ممكن بعد كدا ،تولع فيك.
نادر بمـرح:مفيش أحلي من الجنان في الحُب..انا واثق أن نيره بتبادلني نفس المشاعر..بس هي شايفه أن احسن طريق للموضوع دا..انها تخبي مشاعرها لحلالها..علشان كدا هي كبيره في نظري أوي.
أجهشت نيره بالبكاء وهي تضرب بقبضتها الصغيره فراشها وهنا تابعت بنبرآت مُتقطعه…
-يعني كان بيضحـك عليا!!..وانا اللي غلطت وصدقته..لا وكمان استغبيت وحبيته..استاهل،استاهل كُل اللي بيحصلي والوجع اللي جوايا.
في تلك اللحظه إحتضنت وسادتها في مراره وما هي إلا لحظات حتي وجدت هاتفها يُعلن عن مجيء إتصالاً، وهنا نظرت للمُتصل ثم أجابت ببكاء..
-ايوه يا ياسمين!!
ياسمين بشك:نيره ،،إنت بتعيطي!!
نيره ببكاء أكثر:مخنوقه شويه.
ياسمين بقلق:طيب إنتِ في الفيلا!!
نيره بهدوء:اه.
ياسمين بتتابع يكسوه التوتر:ط طط طيب هو حمزه لسه موجود!!
نيره بإستكمال:لا حمزه راح الشركه.
ياسمين بحسم:خلاص انا جيالك حالاً.
-أزيك يا كوكي!
أردفت دعاء بتلك الكلمات وهي تُحادث السيده كوثر في حين تابعت كوثر بهدوء…
-بخير الحمدلله وإنتِ يا دودو!
دعاء بهدوء: الحمدلله..كُنت حابه اتكلم معاكِ في موضوع مهم اوي.
كوثر بإنصات:سمعاكِ يا حبيبتي!
دعاء بجديه:احنا جايين زياره ليكم بالليل..علشان نطلب إيد نيره لـ نادر ابني.
كوثر بتفاجؤ:بصراحه فاجأتيني يا دعـاء..بس تنورونا طبعاً.
دعاء بسعاده:بنورك يا روحي.. وأخيراً هنبقي قرايب.
كوثر بهدوء:علي خير بإذن الله.
دعاء بتذكُر:عاوزاكِ تبلغي نيره إن في عريس متقدملها..بس ما تقوليلهاش انه نادر.
كوثر بإستغراب: ودا ليه!!
دعاء بحب:هفهمـك كل حاجه بعدين.
كوثر بتفهُم:تمام.
أنهـت كوثر حديثها مع السيده دعـاء وما هي إلا لحظات حتي وجدت ياسمين تدلف داخل القصر وهنا تابعت كوثر بسعاده…
-ياسمين حبيبتي،وحشتيني.
قامـت ياسمين بإحتضانها في إشتياق مُردده..
-وإنتِ كمان يا ماما.
كوثر بلوم:لو وحشتك فعلاً ما كونتيش ،سيبتيني .
ياسمين بحزن:اوقات بنضطر نعمل حاجات مش حابينها ولا عاوزينها ،بس علاج جروحنا فيها.
كوثر بحنو وهي تضع قبله علي جبينها:ربنا يبعد عنك الحزن والغم،،ويعوضك خير عن كُل حاجه فقدتيها.
إبتسمت لها ياسمين بحنو وبعدها رددت مُتسائلـه..
-هطلع اشوف نيره إتأخرت عليا ليه.
كوثر بهدوء:ياريت يا ياسمين تبلغيها أن في عريس جاي يشوفها النهاردا.
ياسمين بهدوء:علي خير بإذن الله يا ماما.
إتجهـت ياسمين إلي غرفه نيره لتجدها مُسجاه علي الفراش والدموع تنهمـر علي وسادتها بغزاره وهنا أسرعت ياسمين إليها ومن ثم قامت بإحتضانها في ضيق..
-فيكِ ايه بس يا نيره!!
نيره وقد تلونت مُقلتي عينيها باللون الاحمر:غلطت وحبيته أوي يا ياسمين وهو باع وعـده ليا.
ياسمين بثبـات:تقصدي نادر!!
نيره بضيق:ما تقوليش اسمـه تاني.. مش مسامحاه.
ياسمين بهدوء:هو ايه اللي حصل !!
نيره ببكاء هيستيري:اتصل بيا وقالي انه هيسافر وطلب مني أنسي وعده ليا.
ياسمين بتفهُم:اممم مش يمكن في ظروف اجبرته علي كدا!!،التمسيله الاعذار يا حبيبتي.
نيره بإنهيار:ما كنتش مشكلتي من الاول،يوم ما جه يوعدني بأنه بيحبني ومش هيسيبني.
ياسمين بحزن لحال صديقتها:طيب ممكن تهدي،قبل ما اقول خبر مهم.
نيره بترقُب:خبر ايه!!
ياسمين بتلعثم:في شاب جاي يتقدملك النهاردا..وماما كوثر بتقولك جهزي نفسك.
نيره وقد جحظت عينيها:نعم!!…لا لا لا طبعاً مش هقابل حد.
وهنـا أسرعت ياسمين بإحتضانها اكثر مُردده بضيق..
-أهدي يا حبيبتي.
شـردت ياسمين في تلك اللحظه لمـا حدث قبل نصف ساعه مضت ،حيث وجـدته يتصل بها لتُجيبه ياسمين بهدوء…
-السلام عليكم ورحمـه الله وبركاته.
نادر بهدوء: وعليكم السلام..ازيك يا ست الكُل.
ياسمين بإبتسامه هادئـه:بخير ..اخبارك ايه انت!!..ونفذت اللي وعدتني بيه!
نادر بسعاده:نفذت اللي وعدتك بيه من زمان اوي،واخدت بنصيحتك وقررت اسيب نيره لربنا يحافظلي عليها ،لحد ما أكون جاهز ،وعمر حبي ليها ما بيقل وهي بعيده عني..بس انا لقيت حل كويس اوي ،وقررت اتقدم رسمي.
ياسمين بسعاده:بتتكلم بجد!!
نادر بفرحه:بجد الحمدلله.
ياسمين مُكمله:بس قررت تتقدم بدري أزاي!!
نادر بإستكمال:كلمت امي،ولقينا حل سوا وانها هتديني سُلفه وهردهالهـا،،وبكدا هكون مرتاح أكتر ونيره معايا.
ياسمين بتفهُم:علي خير بإذن الله.
نادر بتذكُر:إحنا جايين النهاردا نتقدملها..ياريت ما تقوليلهاش عن أي حاجه أبداً..لان هعملهالها مُفاجأه.
ياسمين بإستغراب:ما اكيد ..ماما كوثر او حمزه هيقولولها!
نادر بثقه:لا ما انا ظبطت الموضوع كله.
عــادت ياسمين من شـرودها علي صوت نيره وهي تنهض من الفراش مُردده بحسم…
-أنا هنزل حالاً وهقول لـ ماما،إني مش هقابل حد.
ياسمين بصدمه:بلاش يا نيره..اللي بتعمليه دا مايصحش.
نيره بضيق وهي تتجه خارج الغرفه:لا يصح جداً.
هبطـت نيره الدرج في إنفعـال حتي وصلت حيث تجلس والدتها وبعدها هتفت بنبرآت مُختنقـه…
-ماما..انا مش عاوزه اقابل حد لو سمحتي.
كوثر بإستغراب: ليه يا حبيبتي!!
نيره ببكاء:مش بفكر في الارتباط دلوقتي.
أسرعت السيده كوثر بإحتضان إبنتها في إستغراب وقلق حيث تابعت بقلباً مخضوضاً عليها…
-أهدي يا نيره..مفيش حاجه حصلت لكُل دا..صارحيني يا نيره لو في حد في حياتك!
نيره بإختناق:لو سمحتي يا أمي ،مش عاوزه اتكلم في أي حاجه دلوقتي.
كوثر بتفهُم:طيب ممكن تقابليه ،علشان شكلنا قدام الناس وبعدين ابقي ارفضي.
نيره بضيق:حاضر يا أمي .. حاضر.
-إتفضل يا فندم ،دا ملف التصاميم كُلها الجديده واللي دخلنا بيهم العرض الاول في المُساابقه.
أردفـت السكرتيره بتلك الكلمات بينما تابع قاسم بجديه…
-التصاميم دي..غير تصاميم شركه الشيخ.
السكرتيره بتأكيد:أيوه يا فندم..وحددنا ميعاد استلام القطع منهم،لان تم تجهيزها من ايام فاتت وبإذن الله هنبلغ مُدير الشركه بميعاد الاستلام.
قاسم بتفهم:تمام جداً..عاوزين نكون جاهزين تماماً لـ يوم العرض.
“حل الليل سريعـاً”
-شكلك زي القمـر يا نانو
أردفـت ياسمين بتلك الكلمات وهي تنظر إلي صديقتها في سعاده في حين تابعت نيره بوجهاً مُقتضباً…
-ياسمين،إنتِ مابقيتيش حاسه بيا أبداً.
ياسمين بلوم:انا يا نيره!!
نيره بضيق: إنتِ مش شايفه وشك فرحان أزاي..وانتِ عارفه كويس اوي ،إني مش مبسوطه.
ياسمين بثبـات:متستعجليش الامور “لعل الله يحدث بعد ذلك امرا”.
نيره بحزن:ماشي يا ياسمين..هقابله بس مش موافقـه.
في تلك اللحظه دلفـت السيده كوثر داخل الغرفه ثم رددت بنبرآت فرحـه..
-العريس واهله وصلوا يا بنات..ومستنيينك يا نيره.
نيره بوجهاً مُكفهراً:اووووف..حااااضر.
إتجهت نيره بصحبه والدتها وياسمين حيث غرفه الصالون وكـادت الدموع أن تخونها وتسقُط من شده الإختناق وما أن وصلت أمام باب الغرفه حتي أخذت شهيقاً طويلاً لتستمد منه بعض القوه لتحمُل هذه اللحظه ومـا أن دلفت للداخل حتي جحظـت عينيها غير مُصدقه ما تري..
ظلت مُسلطه مُقلتي عينيها بإتجاهه لا تقوي علي الحـراك مُطلقاً بينما تابعت السيده دعاء بحنـو..
-زي القمر يا نيره ..ماشاء الله عليك ِ.
حمزه بثبات:أقعدي جنبي يا نيره.
وهنـا أجهشت نيره بالبكاء وسط الجمـع الجالس داخل الغرفه بينما قامت ياسمين بإحتضانها محاوله تهدئتها قائلـه…
-أهدي..نادر موجود أهو..ما خلفش وعده زي ما قولتي. المفروض تفرحي يا حبيبتي.
كوثر بقلق:أسفين يا جماعه..بس هي من إمبارح مش طبيعيه أبداً.
هشام وهو ينظُـر لـ زوجته نظرات ذات مغزي ومن ثم همس بخفوت…
-نادر..صدم البنت.
قام حمـزه بإلتقاط كف شقيقته ومن ثم أجلسها بجانبـه وهو يُتابـع في هـدوء..
-نيره.. إنتِ كويسه!!
نيره وهي تمسح دموعها بظهر يدها:اه كويسه.
في تلك اللحظه امـد نادر يده لها بمنديلاً لترمقه هي بنظرات مُتوعـده حيث هتفت بغيظ…
-مش عاوزه حاجه منك.
حمزه بهدوء: نيره.. اهدي خلاص..وبعدين لو مش عاوزه الجوازه دي،اعتبري إن مفيش حاجه حصلت.
إنتاب نيره الصمـت الشديد وكأن علي رأسها الطير وهنا تابع حمزه بخُبث..
-بنعتذر منك يا نادر ،شكلها مش موافقه.
نيره بنبرآت مُتسرعه:لا انا ما قولتش كدا.
أطلـق الجميع ضحكات عاليه نتيجه لما فعلته نيره بينما تابع حمزه بحنـو…
-يعني ايه قرارك النهائي دلوقتي!!
نيره بخجل: موافقة.
تعالـت الزغاريد داخل القصر من قبل الخادمات ،اللواتي تابعن الموقف من البدايه ،وبالفعـل شرعوا في قراءه الفاتحـه كـ بدايه مُبشره لتوافق قلبين بالحلال…
نادر بمرح:هو انا ممكن اقعد مع خطيبتي!!
حمزه بغيظ:من اولها كدا!!..وبعدين لسه مرحله الخطوبه علي فكره.
نادر بمرح:قبل ما ترفُض إني اقعد مع خطيبتي..افتكـر الخطه ها ها!!
حمزه بتمويه:يخربيت اللي يأمنك ع اسرار..خلاص موافق..بس علي الانتريه اللي في وشنا دا.
نادر بموافقه:تمام بكرا تبقي مراتي..ومحدش يكون له عليا فضل يا عم حمزه.
كوثر بسعاده:ربنا يديم الفرحه بينكم يا ولاد..وناس هنا قلبها يحن علي ناس.
حمزه ملتفتاً بإتجاه ياسمين ومن ثم غمـز لها بعينيه..
أشاحـت ياسمين بوجهها بعيداً عنه بينما تابعت كوثر موجهه حديثها لـ ياسمين…
-ياسمين حبيبتي..لو سمحتي هاتي لي فوني من الأوضه.
ياسمين بتفهُم:حاضر يا ماما.
وهنـا نظر حمزه بإتجاه هشام ليقوم هشام برفع علامه (الاوكيـه)بيـده لبدأ مُخططهم…
“علي الجانب الأخر”
-نيره خلاص بقا لو سمحتي!!
أردف نادر بتلك الكلمات في ترجي بينما تابعت هي بغيظ..
-لو سمحت ما تتكلمش معايا خالص.
نادر بخُبث:ولما إنتِ مش طيقاني كدا ..وافقتي عليا ليه!
نيره وهي تنظُـر له بصدمه:والله!!
نادر بحنو:بهزر معاكِ يا مجنونه..علي العموم أتفضلي احلي ورد لأجمل عروسـه.
نيره وهي تلتقط منه الباقه: شكراً.
نادر بفرحه:يعني خلاص مش زعلانه!
نيره وهي تنظُـر له بجانب عينيها:لا طبعاً لسه زعلانه.
نادر بضحك:طيب والشيكولاته دي ،اوديها فين!
نظرت نيره لعلبه الشيكولاته الموضوعه بين يديه في شكل هديه وملفوفه بفيونكـه ورديه اللون وبعدها قامت بإلتقاطها في فرحه..
-أنا هاخدها طبعاً.
نادر بسعاده:مبسوط إني هشوف دبلتي في ايدك.. وهتكوني من حقي في أقرب وقـت،مبروك عليا إنتِ.
في تلك اللحظه إتجه حمزه خلف ياسمين نحـو غرفه والدها وقبل أن تترجل خارج الغرفه ،تصطدم به وهنا شهقت في خضه…
-بسم الله الرحمن الرحيم..خضتني علي فكره.
إتجـه حمزه داخل الغرفه ثم اغلق الباب خلفه وهو يسده بجسده وهنا تابعت هي بضيق..
-حمزه لو سمحت افتح الباب.
حمزه رافعاً حاجبيه:وبعدين معاكِ بقا يا أوزعـه..هتفضلي تفرضي عِندك عليا وانا ساكت.
ياسمين بتوتر:انا عنيده ومش هتغير.
وهنـا قام حمزه بإمساك ذراعها ومن ثم دفعها إليه وقام بإلفاف يده حول خصرها مُـردداً..
-مشكلتك إنك كلام وبس..وانا مش عاوز اتعامل بأسلوبي معاكِ علشان بحبك ومش قابل اشوف دموعك..وعارف انك لما بتسحـي بتعملي فيضانات.
ياسمين وهي تُحاول التخلص من ذراعيه:علي أساس أن انا بعيط من اللا شيء.
حمزه بحنو وهو يطبع قُبله علي جبينها:طيب ما انا اعتذرت.
ياسمين وهي تبتعد بوجهها إلي الجهه الاخري:اعتذارك مش هيعالج اللي جوايا..وبعد أذنك اللي بتعمله دا مينفعش.
حمزه بصرامه وهو يتركها :مفيش خروج من البيت تاني..دا أخر كلام عندي..اللي يسيب مراته تبات برا بيته مايبقاش راجل..وانا اتجاهلت كُل دا بحجه انك محتاجه فتره نقاهه.
ياسمين بضيق:بس انا مش عاوزه أكون مراتك ،افهم بقا.
حمزه وهو يتجه خارج الغُرفه :بس انا مش هقبل غير انك مراتي وام اولادي بإذن الله..وأتمني كلامي يتسمـع بحذافيره.
وهنا إلتفت لها من جديد حتي جعلها تنتفض فزعاً وهو يُقرب اصبعـه السبابه ناحيته…
-يتنفذ بحذافيره…حذفوره حذفوره..وإلا هتندمـي.
غـادر حمزه المكان علي الفور بينما ضربت هي بقدميها الارض كـ الاطفال وهي تُتابع بغيظ..
-يعني أيه!!..هو هيحبسني وبعدين انا عندي ندوه في ملجأ أيتام ومتفقـه مع الناس كمان نص ساعـه..انا همشي وأعلي ما في خيله يركبه.
وهنـا إتجهت ياسمين للاسفـل ثم تابعت بنبرآت ثابتـه للجميع…
-استأذنكم يا جماعه،عندي نـدوه في ملجأ ولازم أكون موجوده في خلال نص ساعه .
كوثر بتفهُم:ربنا معاكِ يا بنتي.
رمقها حمزه بنظرات مُتوعـده بينما تلاشت هي النظر له وبعدها إتجهت مُسرعه خارج القصـر…
“بعد مـرور الربع ساعه”
وصلـت ياسمين حيث الملجأ ،حيث استقبلها الجميع بحفاوه شديده..فقد عُرفت في وقتاً قليلاً بأنها أصغر داعيـه اسلاميه في مصر ،كـما احبتها الفتيات لدرجه كبيره…
راقبها حمزه بسيارته طيله الوقـت وما أن وجدها تترجل خارج السياره ،حتي اصطف سيارته ثم دلف خلفهـا…
جـاب ببصره في أرجـاء المكان وهو يبحث عنها بنظرات مُتلهفـه،يرغب في إحتضانها بجفنيه وصرخاته بها ،كفي بُعداً،،ليجد وفـد كبير من الفتيات يدلفن داخل قاعه كبيره في أحد أروقه الملجأ،وهنـا قرر تتبع خُطواتهم حتي وصل إلي مُبتغاه ،وجدها تجلس القُرفصـاء أرضاً وقد رفعت نقابها حتي تستطع التواصل مع الفتيات..
جلس هو في احد زوايا المكان مُنتظراً،إنتهاء هذه المُناظره،حيث ظل مُحملقاً بها من شده إشتياقه لتفاصيلها الصغيره ،وبعدها بدأت هي في إلقاء كلماتها علي مسامعهم دون أن تنتبه قط لوجوده بينهم…
وبعد مـرور دقائق معدوده يجـد حمزه فتاتين يجلسن امامـه مُباشـره ويحجبن الرؤيه عنه كُلياً…
زفـر حمزه في ضيق ،فقد رغب في النظر لها وقتاً أكثر ،بل طيله الوقت وعندما مل جلوسهم أمامه حتي صاح بنبره عاشقـه….
ايا جبلين من بشر ،،أزاحا النور عن بصري
سألتكما بربكما ،، قليلاً كي اري قمري.
ومـا أن انهي مقتطفته المُفضله إلي قلبه حتي تابع بهُيام..
-بحبك يا حوريتي الصغيره،،ما تبعديش كفايا قلبتلك ع الامام ابن الجوزي وبقولك شعر اهو..مسامحاني مش كدا!!
جحظـت عينيها في صـدمه وهي تجد زوجها يجلس بين الفتيات وهنا نهضت علي الفور وبعدها إتجهت إليه وترجلوا خارج القارعه…
ياسمين بضيق:إنت كُنت بتراقبني!!
حمزه بثبـات:خايف علي مراتي.. وبحميها في صمت ايه مشكلتك!!
ياسمين بغيظ أكثر:وبتحطني قدام الامر الواقع ،بين كل البنات!!
حمزه بنبرآت ثابتـه:احطك قدام الامر الواقع ليه!!.. تقريباً انا قولت مفيش خروج من القصر..وإنتِ بتضربي بكلامي عرض الحائط فطبيعي هنفذ تهديداتي.
ومـا ان أنهي حديثه حتي قام بحملها بين ذراعيه في حسم وسط صدمتها مما يفعل وهنا أخذت تضرب بقدميها في الهواء بإعتراض وضيق بينما تابع هو بعناد أكثر…
-استعنا ع الشقي بالله.
يتبع
#علياء_شعبان