الفصل 21 ( كبرياء الصمت )
منار : كدا كويس
عاصم : اه انا هروح انام
منار شدته من ايديه : عاصم استني
عاصم بيلبس القميص : انا لازم انام معلش
منار :عاصم عايزة اتكلم معاك استني بس
خرج عاصم و بعد بسرعة عنها و دخل اوضته كانت ايسل نايمة حضنها و قبلها من رأسها
ايسل صحيت من النوم : حبيبي انت جيت
عاصم : اه
ايسل : طب اقوم هحضرلك العشا
عاصم : لالا خليكي انا مش جعان
ايسل : مالك يا عاصم
عاصم : مفيش بس انتي كنتي وحشاني اوي بتحبيني قد ما بحبك
ايسل : اخص عليك يا عاصم ده انت ابويا و اخويا و كل حاجة ليا في الدنيا
عاصم : و مفيش جوزك ولا ايه
ايسل بتضحك : جوزي هو كل حاجة في حياتي
عاصم : ربنا يخليكي ليا
ايسل : و يخليك ليا يا عمري
عاصم : اه صحيح انا جبتلك الحلويات دي و دول بتوع فريدة حطيهولها بكرة الصبح جنبها
ايسل : بتحسسني ان انا طفلة ولله
عاصم : لا مش طفلة انتي بنتي
ايسل : ربنا ميحرمنيش من حنيتك عليا دي
_______________
روان بتتصل ب شادي
روان : شادي ازيك … انا روان … اه كنت بكلمك بخصوص الشغل …. تمام انا موافقة شوف هنبتدي امتي
_______________
عمرو فاتح موبايله و بيسمع اغنية ( نهاية عادية ) ل احمد سعد و بيفتكر تصرفات روان
عمال بتوجع فى قلبي ليه
يعنى اللى بينا ده نهايته دي
لو مش حاببنى مفيهاش كسوف
ابعد و شوف ناوي هتعمل ايه
اعمل بعشره و حاجات كتير
كان برضو بينا احساس كبير
عايز تبيعنى بشياكه بيع
وانا مش هضيع و لعله خير
لو جالى يوم ابعد عنك
مش ده اللى بستناها منك
بعد ما عيشت اتطمنلك
هتسيبنى سيب و متجرحنيش
خلي الوداع فى حنيه وكفايه بزياده اذيه
انا نفسى فى نهايه عاديه توجعنى بس متكسرنيش
_______________
تاني يوم الصبح
ايسل : موني انا جهزتلك الفطار طبعا هتتغدي معايا
منار : لا همشي مش عايزة اتقل عليكي
ايسل : تتقلي ايه يا هبلة انتي بصي انا هنزل اشتري شوية طلبات و هعدي ع جدو اشوفه و هاجي المهم لما فريدة تصحي ابقي اكليها انا محضرالها فطارها كدا كدا هتلاقيه ع البار في المطبخ
منار :ماشي يا قلبي متقلقيش
ايسل : و عاصم كدا كدا نازل كمان نص ساعة
_______________
بعد دقايق كانت ايسل خرجت دخلت منار غرفة ايسل و كان عاصم لابس شورت و فانلة كات
عاصم : منار انتي بتعملي ايه
منار خلعت الروب اللي لابساه : و قعدت جنبه
عاصم : انتي بتستهبلي صح
منار شدته من ايديه و حضنته : عاصم انا بحبك
عاصم : مش هينفع …صدقيني مش هينفع ممكن تخرجي دلوقتي
_______________
منار نايمة جنب عاصم علي السرير و بتلبس الروب و بتقفله
عاصم: انتي دخلتي ليه عندي
منار : عشان وحشتني
عاصم : لا عشان تثبتي لنفسك اني مقدرتش اقاومك
منار ضحكت و قربت منه : ابتديت تفهمني
عاصم بعد عنها : منار انا مش عارف انا عملت كدا ازاي و مش عارف ازاي استسلمت
بيلمس دبلته : انا بحبها مش عارف انا ازاي عملت فيها كدا انا حيوان عشان خونتها بس تعالي نتفق ع حاجة اللي حصل انهاردة ده كان غلطة و مش هتتكرر تاني يا منار انا هنزل عشان عندي شغل هستناكي برة كملي لبسك
_______________
روان بتفتح باب الشقة كان عمرو ع الباب و في ايديه بوكيه ورد احمر
عمرو : مش هتقوليلي اتفضل
روان سكتت لحظات مش مستوعبة ان عمرو هيصالحها بنفسه : اتفضل
دخل معاها الصالون
روان : اتفضل يا عمرو
هند والدتها : ربنا يهديكو يا حبايبي هعملك حاجة تشربها يا عمرو
عمرو : ميرسي يا طنط تسلمي
خرجت هند و روان كانت واقفة ضهرها ل الشباك
عمرو : ممكن متزوديهاش بقا كفاية الايام اللي فاتت دي
روان : انت عارف انت قولتلي ايه
عمرو : انا اسف بس انتي برضو غلطتي
روان : بس مكنش ينفع تقولي عايزك محترمة
عمرو : انتي محترمة غصب عن عين اي حد مكنش قصدي فعلا خلاص بقا هتفضلي قاطعة عليا الماية و النور كدا
روان : عشان انت
عمرو قاطعها : عشان انا بحبك
روان بابتسامة : كنت فاكرة انك هتبطل تحبني من خناقنا آخر مرة
عمرو : عمري ما بطلت احبك من اول مرة شوفتك لحد دلوقتي
روان ساكتة بتسمعه و هي مبسوطة
عمرو : بصي انا جبتلك ايه
روان : الورد حلو اوي
عمرو بيخرج بوكس صغير ملفوف بشريط احمر بتفتحه كان ايفون 7 بلص
روان : ده بجد
عمرو : كان نفسك فيه
روان : أيوة بس ده غالي اوي
عمرو : اخدت مكافئة من الشغل و كنت بصراحة عايز اجيبهولك من فترة
روان : ده بقا رشوة عشان ابعد عن حوار الموديل صح
عمرو : يعني تقدري تقولي كدا هتسيبي الشغل ده
روان : موافقة
روان بتلقائية حضنته و رأسه مالت علي كتفها
عمرو : بحبك
روان : وانا كمان بجد
_______________
بوسي بتتفرج علي Tv علي قناة cbc سفرة و جنة قاعدة جنبها و بتلعب مع عمار
احمد : انا نفسي افهم بتتفرجي ع الشيف الشربيني ليه وانتي اصلا مش بتعملي في الاخر غير بامية و رز و فراخ
بوسي : احمد انا عايزة عربية
احمد : قولتيلي هتعملي البامية حمرة ولا بيضة
بوسي: أحمد بتكلم بجد
احمد : انا مش فاهم انتي عايزة عربية تروحي بيها فين
جنة: اه صح يا مامي تروحي بيها فين
بوسي : اروح لماما نخرج انا و جنة و ابني اعمل اي مشوار انا عايزاه الصبح اشمعنا انت بتروح لمامتك كل يوم
جنة : ايوة صح يا بابي ده استعمال كويس للعربية كل يوم اشمعنا انت بتروح ل تيتا كل يوم
احمد : انتي معايا ولا معاها يا بت انتي
جنة : هاتلنا عربية يا بابا بقا
_______________
في المساء
عاصم : ايسل هنتعشي برة انهاردة اوكيه
ايسل : تمام
عاصم : انتي بتعملي ايه
ايسل بدور علي بامبرز فريدة مش فاكرة حطيته فين
عاصم حضنها من ضهرها و سند رأسه علي كتفه : خلاص هجيب غيره لو مش لاقياه ينفع اقول وحشتيني
ايسل :امممم ينفع
عاصم : طب ينفع نفتكر زمان
ايسل : زمان امتي
عاصم : قبل ما نتجوز
ايسل : قبل ما نتجوز لو كنت مسكتني كدا كنت هتضرب
عاصم :دي كانت مرة علي فكرة و بعدين انتي كنتي بتفلتي مني بس سيبك اشيل أيدي فعلا ولا اسيبها.
ايسل : اممم شيلها عشان متضربش
عاصم شدها من ايديها و قعد ع الكنبة : تعالي كدا
ايسل : ايه
عاصم قعدها علي رجله : مبسوطة وانتي معايا
ايسل : جدا بس بخاف
عاصم : من ايه
ايسل : من كتر ما انت حاجة جميلة بخاف كل ده يروح
عاصم قبلها من كف ايديها : عارفة لما ببوسك هنا ده معناه ايه
ايسل بابتسامة : ان عاصم ملكي
عاصم : بتحبيه
ايسل : اوي
عاصم : و هو كمان
ايسل : بيحبني
عاصم : اوي
ايسل : طب ينفع احضنك اوي بقا
عاصم : يا سلام ينفع طبعا بس عايز حضن جامد اوووي
ايسل : طب هنتعشي فين الأول
عاصم : هنروح المطعم إلى كنا بنتقابل فيه ايام الخطوبة
ايسل : لا ده انت تستاهل حضن كبير اوي يعني
_______________
في يوم
ايسل بتكلم مع بوسي في الموبايل
ايسل : انتي عارفة احمد بيعند معاكي ليه عشان مش بتعرفي تسوقي
بوسي : يا ايسل مانا هتعلم السواقة
ايسل : و هو فيه حد بيتعلم السواقة اليومين دول يا بنتي ده الواحد مش عارف يمشي في الشارع
بوسي : حتي انتي
ايسل : خلاص انا هقول ل سيف يكلمه و يقنعه يوافق
بوسي: يا بنتي كدا كدا الفلوس معايا انا محوشاهم و هجيبها من صاحبتي هي مسافرة و هتبيعها بس هو قالي هيحطلي عليهم فلوس المشكلة في احمد مش موافق عشان حوار السواقة ده
ايسل : لو كدا نقوله سيف هيعلمك وانا كمان بعرف
_______________
روان قاعدة في غرفتها و بتتفرج علي Tv موبايلها بيرن كان شادي
روان : الو
شادي : روني ازيك … فينك يا بنتي مكلمتنيش من اخر مرة يعني
روان : موجودة بس يعني قولت معطلكش
شادي : تعطليني ..تعطليني ايه بس يا قمر هو ده كلام ولا انتي بقا استرخمتي دمي
روان بتضحك : خالص ولله بالعكس ده انت دمك خفيف اوي
شادي : بس كنت بكلمك يعني و مبترديش
روان : مفيش بس كنت بحاول اظبط الحوار مع ماما
شادي : باين عليكي هتتعبيني
روان : انا خالص ولله
شادي : هنشوف المهم بكرة عايزك الساعة 5 عشان نعمل الفوتوسيشن اللي مش عايز يتعمل ده
روان : مينفعش قبل كدا يعني ع الساعة 1 او 12
شادي : لا الصور مبتطلعش حلوة الوقت ده أحلي صور اللي هي قبل الغروب بساعة
روان :بكرة بكرة يعني انا مش مصدقة
شادي : اه طبعا يا بنتي بكرة عشان الصور تلحق تطلع المهم هظبط المكان اللي هصور فيه و ابعتلك العنوان في Massage
روان : ok تمام
_______________
_______________
ايسل قاعدة في شقة مختار بتتفرج علي فيلم ابن حميدو و جنبها فريدة و عبير
ايسل:الفيلم ده مهما أتفرج عليه مش بزهق افلام زمان دي ميتشبعش منها بجد
عاصم دخل الريسبشن و محدش حس بيه مسك الريموت و قفل ال Tv
ايسل : شوفتوا الجنان
عبير :هات الريموت يا عاصم
عاصم اخد الريموت و وقف بعيد عنها
ايسل : يا اخي كنت أتأخر نص ساعة بس كان الفيلم خلص
عاصم : يعني الفيلم ده اهم مني
ايسل : اه
عاصم : الفيلم ده اهم مني يا فريدة لو قولتي اه مش هتاخدي حاجة حلوة
فريدة : لا انت يا بابي
عبير بتضحك : طب ولله انت احلى من احمد رمزي يا عاصم
ايسل : يا سلام
عاصم رفع حاجبه: ايه مش عاجبك كلام ماما
ايسل : لا طبعا مش عاجبني
عاصم : يعني احمد رمزي احسن مني
ايسل : طبعا
عاصم بيجري وراها: طب وحياة امي هثبتلك اني احسن منه
ايسل : يا عاصم استني بقا
عاصم : لا يمكن مش هسيبك الا لما تعترفي ان انا احسن
ايسل : لا احمد رمزي طبعا
ايسل خرجت من الريسبشن و بتجري من عاصم خبطت في سيف و استخبت ورا ضهره
عاصم شدها جامد و حضنها : ماهو انا كان لازم اثبتلك اني احسن من احمد رمزي ها هتعترفي بقا ولا ايه
ايسل : امممم احسن طبعا
_______________
عاصم : فريدة انتي بتحطي روج
فريدة : ده مس روج
عاصم : اومال ده ايه
فريدة : ده سبدة (زبدة ) كاكاو عامل زي الروج
عاصم : يعني هتحطي روج
فريدة : مس هحط روج يابني انت مس فاهم حاجة ده سبدة كاكاو اوعي كدا
عاصم : فريدة اقفي كدا و كلميني … انتي بتحطي ميكب
فريدة بنرفزة : ده مس ميكب
عاصم : لا انتي بتحطي ميكب
فريدة : لا ده مس ميكب
عاصم : بس ده روج
فريدة : بابي انت مس عايز احط روج ليه انا كبرت اصلا
عاصم : يعني انتي بتتكلمي عن الروج اصلا
فريدة : اااه عسان انا بحب الرووج بحب بوءي يبقي جميييل
عاصم : ولله هو جميل من غير روج مينفعش يا ديدا نحط روج طبعا
فريدة : لا ينفع عسان انا كبرت خلاص انتو ليه مس فاهمين ان انا كبرت ها انا كبرت خلاص حبة صغرين
عاصم : مينفعش تحطي روج حتي لو كبرتي
فريدة خرجتله لسانها: لو كبرت زي مامي هحط ميكب
عاصم : لا مش هتحطي
فريدة بعصبية فتحت درج الميكب بتاع ايسل : بابي انا عايزة احط حاجة من ده عسان اكون جميلة و بوءي جميل
عاصم : يا ديدا انتي جميلة اصلا تعالي هوريكي حاجة جايبهالك عشان عيب نلعب في حاجة مامي
_______________
عاصم : يعني بوسي مشاكلها اتحلت الحمدلله جابت العربية و احمد وافق
ايسل : بس احمد قالها لو حصل اي حاجة ماليش دعوة و سيف علمها السواقة وانا اوقات كنت بعلمها
عاصم : طب كويس الحمد لله
ايسل : مالك يا حبيبي
عاصم : مفيش مودي ( مزاجي ) وحش اوي
ايسل :طب ما تيجي ندخل جوة وانا هغيرلك المود ده خالص
عاصم : لا مش لازم
ايسل حضنته: اسمع كلامي بس علاج المود الوحش ده عندي
عاصم :ايسل لازم اقولك
ايسل : في ايه يا عاصم
عاصم : انا عملت حاجة غلط لازم تعرفيها عشان انا مش بخبي عليكي حاجة لكن المرة دي لساني كان بيتشل لما اجي اصارحك
ايسل: قول
عاصم : انا خونتك
_______________
ايسل بتجهز شنطة ملابسها و شنطة فريدة
ايسل بعصبية و دموعها غرقانة علي خدها: قولتلك مش عايزة اسمع منك كلمة
عاصم : ما انتي لازم تسمعيني و تعرفي انا عملت كدا ازاي
ايسل : كداب من قبل ما تتكلم الكلمة الوحيدة اللي عايزة اسمعها هي انك تطلقني
عاصم : ممكن تهدي
ايسل : مش عايزة اهدي طلقني يا عاصم طالما مش مالية عينيك طلقني
عاصم : مين قالك انك مش مالية عيني انا جيت قولتلك اني غلطت مقدرتش اخبي عليكي انا اسف غصب عني يا ايسل مش عارف ايه اللي حصلي
ايسل : لو انا كنت جيت قولتلك انا عملت كدا مع واحد كنت هتسامحني يا عاصم
عاصم : يا ايسل فيه فرق بين الراجل و الست
ايسل بنرفزة : بس مفيش فرق في المشاعر يا عاصم الجرح هو هو
عاصم : صدقيني غصب عني
ايسل : احنا من يوم ما اتجوزنا قصرت معاك في ايه اهملتك في يوم يعني جيت يوم قولتلك لا مش عايزة اقعد معاك في يوم جيت قولتلك لا انا تعبانة و مهدودة من ترويق الشقة و غسيل المواعين و فريدة و صداعها جيت في يوم قولتلك بلاش و في الاخر تخوني
_______________
جلال : يا سيف احنا مش عارفين اي حاجة دي اول مرة تسيب البيت من وقت ما اتجوزوا و من ساعة ما ايجت قافلة الأوضة علي نفسها و مبتردش علي حد
سيف : طيب ممكن تقولها أن انا عايز اتكلم معاها
صفاء : ياربي انا تعبت دي حتي مش عايزة تتكلم مع حد و فريدة بتكلمها بالعافية
جلال : قوليلها ان سيف عايز يتكلم معاها يا صفاء
صفاء : حاضر يا بابا ثواني هدخلها
بعد دقايق خرجت صفاء من غرفة ايسل و ايسل معاها
ايسل : سيف
سيف : طيب عن اذنك يا جدو هنقعد في البلكونة
جلال : ماشي يا سيف يارب تتكلم معاك
دخل سيف و ايسل البلكونة و ايسل قعدت علي الكرسي و دموعها بتنزل منها
سيف : مامتك و جدو عايزين يتكلموا معاكي وانا قولتلهم يسيبوكي شوية ميضغطوش عليكي حتي عاصم بتصل عليه مبيردش و مش بيفتح لحد
ايسل : و مش هيرد ولا هيتكلم بعد اللي عمله
سيف بقلق: ليه عمل ايه
ايسل سكتت
سيف : ايسل اي حاجة هتقوليها و مش عايزة حد يعرفها مش محتاج اقولك أنها هتفضل سر متخافيش قولي في ايه
ايسل : كنا قاعدين مع بعض لقيته بيعترفلي انه خاني
سيف بصدمة: ايه … مع مين
ايسل : مع الإنسانة اللي كنت فاكرة أنها صاحبتي صاحبة الطفولة من ابتدائي
سيف : منار
ايسل : متقولش اسمها قدامي
سيف : طب ازاي
ايسل : واضح انهم بقالهم فترة مع بعض وانا كنت الهبلة اللي بيتضحك عليها و طبعا لولا انه اعترفلي كان زماني لحد دلوقتي مضحوك عليا يا سيف
سيف : انا مش قادر أصدق
ايسل منهارة : لا صدق يا سيف اصلا الدنيا دي مبقاش فيها حاجة يتزعل عليها ولا بقا فيها امان
سيف بيحاول يهديها : طب ممكن تهدي
ايسل : عشان خاطري يا سيف اقعد معاه و خليه يطلقني من سكات
سيف : هي حصلت للطلاق
ايسل : اومال انت عايزني افضل معاه بعد اللي عمله
_______________
روان : مش قادرة أصدق منار
بوسي : بس انتى الغلطانة يا ايسل
ايسل : نعم غلطانة في ايه
بوسي :المفروض ان الاخت ها ركزي ع دي مبتروحش تبات عند اختها لوحدها في وجود جوزها الا في الضروريات ودي لا هي اختك ولا دي ضرورة انها تبات عندك اساسا و حتى لو جاية تتعشا معاكي ايه المشكلة أنها تروح في نفس اليوم و ايه المشكلة لما تبات لوحدها عشان مامتها مش في البيت مش كدة احسن ما تبات في بيت راجل غريب بس انتي مكانش المفروض تخليها تبات عندك في وجود زوجك عموما اللي حصل حصل ده حتي المثل بيقول حرص ولا تخون
ايسل : كنت واثقة فيها و فيه دي صاحبة الطفولة
بوسي : مفيش حاجة اسمها واحدة مع واحد في بيت واحد و بنتك الصغيرة نايمة الشيطان يقدر يلعب في دماغ أي حد
روان : خلاص يا بوسي اللي حصل حصل
بوسي : عشان متثقش في حد تاني
_______________
عبير :سيف مقولتليش يعني عملت ايه مع ايسل هي سابت البيت ليه
سيف : مصممة ع الطلاق
عبير : مصممة ع الطلاق ليه اكيد حصلت مصيبة انا مش عارفاها ريح قلبي يابني و قولي ايه اللي حصل
سيف : اكيد عاصم يا ماما هيقولك كل حاجة
عبير بعصبية : انا مش فاهمة يعني روحتلها البيت و رفضت تتكلم معايا و لما انت روحت حكتلك و مش عايز تحكي و اخوك مبيكلمش حد
سيف : ده سرهم هما مش سري انا يا ماما
مختار : مساء الخير يا سيف
سيف : مساء النور يا بابا
عبير : مساء الخير يا مختار هدخل احضرلكو الغدا عن اذنكم
سيف : اتفضلي
_______________
في المساء
عاصم : يا جدو انا رجعت البيت لقيت منار كانت عايزة توقعني في الغلط لكن فوقت و دخلت اوضتي تاني يوم لقيتها طبت عليا في اوضتي فجأة و غصب عني
جلال : ايه اللي بينك و بين منار عشان منار تتشجع و تاخد خطوة زي دي
عاصم : اقسملك بالله ما فيه حاجة بيني و بينها و بعدين الغلط من ايسل أنها تدخل واحدة غريبة الشقة و جوزها موجود
جلال :ايوة هي غلطت في الحتة دي بس هي مخانتش يا عاصم عموما هي طالبة الطلاق لا و مع مين بتخونها مع أعز صحابها
عاصم : انا عايز اكلمها من فضلك يا جدو لازم اكلمها
جلال : ماشي يا عاصم عن اذنك هدخلها
_______________
دخلت ايسل الصالون
ايسل : جدو قالي انك عايزني
عاصم بتنهيدة: ايسل لازم تديني فرصة نتكلم
ايسل بعصبية : مفيش كلام بيني و بينك بعد اللي عرفته و مش هينفع نكمل مع بعض يا عاصم اصل انا متأكدة ان انت مقضيها معاها من بدري مش بس لما ايجت البيت من امتي بقا و ازاي و ليه خلاص مش عايزة اعرفه كل اللي انا عارفاه حاجة واحدة أن جوزي خاني مع واحدة كنت فاكرة أنها صاحبتي بس مبقتش فارقة يا عاصم كدا كدا احنا لازم نطلق
عاصم : ماشي بس انا مش هطلقك
خرج عاصم و هي وقفت لوحدها لحظات و بتبكي
دخلت صفاء و من غير ما تتكلم ضمتها لحضنها
صفاء : غصب عني سمعتكو صوتكو كان عالي ممكن تهدي كل مشكلة و ليها حل يا ايسل
ايسل : هدخل اوضتي يا ماما
دخلت ايسل غرفتها و كانت فريدة نايمة علي السرير قعدت جنبها و بتكلم نفسها
ايسل :مصممة ع الطلاق لكن في نفس الوقت مش عارفة اعمل ايه معاكي يا فريدة بعد ما اتطلق من عاصم مش عارفة انا بظلمك و لا هو اللي ظلمك معانا خايفة عليكي يا فريدة و برضو خايفة علي نفسي أضعف و ارجعله
_______________
جلال :مش معقول هقف أتفرج عليكي و انتي بتطلقي من جوزك و في نفس الوقت مش عايز اقولك ان اختيارك كان غلط لان عاصم اتغير
ايسل : معنديش حل تاني يا جدو هو الي خاني
جلال : هو غلط بس مش هقولك اتطلقي اديله فرصة تانية يمكن تقدري تسامحيه
ايسل : لا يا جدو مستحيل ياخد فرصة كمان هيرجع يخون تاني
جلال : طيب ي حبيبتي وقت ما تحبي تتكلمي انا موجود
_______________
عاصم : يا سيف انا مكنتش علي علاقة ب منار اصلا
سيف : ما هي في دماغها ان علاقتكو دي من قبل كدا
عاصم : سيف انت الوحيد اللي تقدر تقنعها ب كدا غصب عني يا سيف لحظة ضعف
سيف :بتهيالي لو هي اللي عملت كدا مكنتش هترجعلها هي طالبة الطلاق يا عاصم للاسف
عاصم : سيف انا مستعد اعمل اي حاجة بس تديني فرصة تانية انا كنت فعلا اتغيرت
سيف : ماشي يا عاصم انا هقعد معاها تاني و اتكلم معاها يمكن توصلوا لحل غير موضوع الطلاق ده
عاصم : سيف انا مش هقدر أطلقها انا لو خسرت ايسل هبقي خسرت كل حاجة
_______________
سيف بيكلم ايسل في الموبايل
سيف : عاصم قالي انه عايزك تسامحيه و مش هيكرر اللي حصل ده تاني
ايسل :وانت صدقته يا سيف
سيف : مش مهم انا اصدقه المهم انتي
ايسل : انا مش مصدقاه و مش هسامحه ع اللي عمله و مش عايزة منه حاجة غير انه يطلقني
سيف : طب فكري كويس
ايسل : انا فكرت يا سيف و لقيت اني لا يمكن اعيش معاه في بيت واحد تاني حتي مستعدة اتنازل عن كل حقوقي الشبكة و المؤخر و المهر و كل الشقة
سيف : كدا انتي عايزة تخسري كل حاجة
ايسل : بس هكسب كرامتي
سيف : طب فكري كدا و اقعدي معاه و شوفي عايز يقولك ايه حتي عشان فريدة
ايسل : مش هقدر ابص في وشه يا سيف عشان خاطري خليه يطلقني
سيف : ماشي يا ايسل هكلمه و اقوله كلامك ده
_______________
بوسي قاعدة بتأكل عمار سيريلاك و بتقبله من خدوده
بوسي : انا بحبك اوي يا عمورة اوي بجد انت و جوجو يلا بقا عشان تنام يا روحي
بوسي نيمت عمار في سريره الصغير كان في اللحظة دي احمد اخد شاور و خرج و قعد جنبها ع السرير
بوسي :هو احنا متخاصمين ولا ايه
احمد : وحشتك
بوسي : اوي
احمد : هو انتي راشة البيرفيوم بتاعي
بوسي :امممم عشان لما بتوحشني يا حبيبي بحطه و بفتكرك
احمد : لا بجد
بوسي : اه .. مش هتطفي النور
احمد : اه ثواني
بوسي : استني هطفيه انا خليك مكانك
بوسي حضنته و هي بتطفيء الكوبس النور من جنبه
_______________
تاني يوم
في مكتب مختار العدوي
ايسل كانت منتظرة سيف في الطرقة اتفاجأت ب عاصم أمامها
عاصم :مستنية سيف مش كدا
ايسل : اه مستنية سيف انت مالك
عاصم :اشمعنا بتتكلمي معاه وانا لا يا ايسل اشمعنا انا لما بغلط مش بتسمعيني ايسل انتي لازم تتكلمي معايا
ايسل بسخرية: و ليه اتكلم معاك اصلا مش انا خونتك و استغليت طيبتك معايا
عاصم بعصبية :ايسل اسكتي بقا كفاية انتي لازم تسمعيني
في اللحظة دي اتجمع منار و سيف و مختار و معظم اللي بيشتغل في المكتب من صوتهم العالي
ايسل : و ليه أسمعك يا عاصم دلوقتي بقا عشان اكيد مجهز كلامك مش كدا لسة فاكر تقولي بعد ايه بعد ما حصل اللي حصل
عاصم : ايسل انا كنت بحاول احكيلك بس كنت بخاف انتي لازم تعرفي ان انا محبتش حد غيرك يا ايسل لو عملت كدا ف عشان كان غصب عني
ايسل بنرفزة : أيوة ال كلام المعروف ده ياريتني كنت سمعت كلام ماما و صحابي دلوقتي يا عاصم انا مش عايزة غير انك تطلقني و تسيبني و مش عايزة اي حاجة منك وانت بقا روح اعمل كل اللي انت عايزه و عيش حياتك براحتك اعمل اللي انت عايزه و سيبني في حالي بقا
عاصم قاطع كلامها ب قبلة من شفايفها استمرت دقائق و هي مقدرتش تقاومه
بعد دقايق تركته و خرجت من المكتب
_______________
جرس الشقة بيرن
عاصم بيفتح الباب كانت منار دخلت و قفلت الباب خلفها
عاصم : الله يخربيتك احنا هنتجنن ولا ايه انتي بتستعبطي
منار : انت مبتردش علي تليفوناتي ليه بتكنسل عليا يا عاصم
عاصم : افرضي ماما ولا سيف ولا حد شافك انتي ناسية ان ايسل مش هنا
منار : متخافش محدش شافني و بعدين ايسل عند جدها و مش هتيجي كدا كدا
عاصم : انتي ليه مش عايزة تفهمي بقا
منار بخوف:أفهم ايه
عاصم : احنا موضوعنا خلاص انتهي ركزي بقا مع مالك اللي عايز يخطبك ده
منار : هو ايه اللي انتهي علاقتنا عشان تخلص لازم انا وانت نوافق وانا مش موافقة يا عاصم
منار قربت منه و حاولت تحضنه: عاصم انت وحشتني اوي
عاصم بعدها عنه:خلصت يا منار خلصت من قبل ما تبتدي اصلا انا مش عارف يومها ايه اللي خلاني اعمل كدا مش عارف خلصت مبقاش ينفع انا بحبها
منار دموعها نزلت : طب وانا اعمل ايه من غيرك … انا بموت في اليوم 24 ساعة بسبب اللي حصل ولله ما قادرة أبعد يا عاصم انا بحبك و من قبل ما ايسل تشوفك وانا بحبك
عاصم :منار افهمي علاقة زي علاقتنا دي مينفعش تكمل
منار : طب فهمني مينفعش ليه ايه الغلط اللي انا عملته يا عاصم انا مستعدة أفضل معاك و نتجوز
عاصم : مش عايز اقولك كلام يوجعك امشي احسن
منار : بس انت عارف ان انا بحبك انا لو مش بحبك مكنتش عملت معاك كدا
عاصم : دي مشكلتك مش مشكلتي مينفعش ولا ينفع يبقي فيه بينا حاجة انا بحبك مراتي جدا
منار :بس ينفع تنام معايا
عاصم : مكنش غصب عنك كان بمزاجكك
عاصم لسة هيفتح الباب استوقفه كلمة
منار : انا حامل
عاصم بصدمة حاول يداريها بابتسامة : بجد مبروك من مين بقا
منار : انت عارف ان مفيش حد لمسني غيرك
عاصم : واعرف منين
منار بعصبية: لا انت عارف و متأكد يا عاصم
خرج من جيبه فلوسه و اعطاها في ايديها
عاصم : خدي دول و شوفي هتتصرفي ازاي في البيبي بس بعيد عني خالص امسكي
منار بتحاول تستوعب الكلام : انا مش هعمل عمليات و مش هنزل حاجة ده ابننا يا عاصم
عاصم قاطعها: ده ابنك لوحدك
منار : و ابنك انت كمان و لازم تعترف بيه يا عاصم
عاصم : و مين قالك ان فيه حاجة انه إبني
منار: بس فيه صور ليا معاك ماهو انا مقولتلكش ان انا صورتك واحنا مع بعض وانت مش اخد بالك ده غير ان ممكن التحليل يثبت ان انت ابوه و مراتك أعتقد أنها لسة متعرفش ان انا حامل
مسكها من هدومها بعنف و صفعها بقوة علي وجهها: انتي بتهدديني يا بت انتي
منار : لا انا مش بهدد انا لسة هعمل
عاصم : متنسيش كمان تقولي ان انتي اللي حاولتي وانتي اللي كنتي عايزة تعملي كدا
منار : بس انت بعدها استسلمت
عاصم : اطلعي برة
_______________
في كافيه
منار : ايسل
ايسل : عايزة ايه
منار : احنا لازم نتكلم يا ايسل
ايسل : مش قادرة انسي وانتي بتنصحيني اصالحه لما نكون متخانقين صحيح صاحبتي اللي من صغري عموما اديني سايبهولك هتبقي لايقين اوي ع بعض خاين هيتجوز خاينة بس ده لو رضي يتجوزك اصلا بعد ما سلمتيله نفسك من غير جواز و خونتي صاحبتك الوحيدة معاه علي سريري في أوضة نومي
منار : مش كفاية لحد كدا
ايسل : معاكي حق انا بقول كفاية برضو ماهو قلة الأصل و الخيانة دي يا منار منهج و انتي ماشاء الله كنتي دحيحة
منار : ايسل انا حامل
ايسل بصدمة : حامل
منار : انا عارفة اني اخر واحدة ممكن تقفي جنبها بس انا مش طالبة منك غير حاجة واحدة تشوفيلي دكتور يعملي العملية
ايسل بتضحك بسخرية: اساعدك واضح انك بتحلمي
منار : لو خرجتي و سيبتيني انا ممكن اموت نفسي ايسل اعتبري انك بتساعدي اي واحدة صدقيني مش هخليكي تشوفي وشي تاني عارفة اني غلطت بس لو اهلي عرفو ممكن عمي يقتلني بالله عليكي و حياة فريدة يا ايسل
ايسل : انا ماشية و جيت عشان كان فيه كلام نفسي أقوله و قولته خلاص
ايسل خرجت من الكافيه و وقفت لحظات و رجعت تاني
ايسل :منار انا هساعدك عشان كان فيه يوم من الايام بينا عشرة هي اه راحت بس دي اخر مرة هساعدك فيها و بعدها ماليش دعوة بيكي بس قبل ما توافقي ع مالك تقوليله كدا وافق يفضل معاكي تمام موافقش يبقي خلاص
منار : بتتكلمي بجد
ايسل : هتفق مع الدكتور و اكلمك تاني باي
_______________
بوسي نايمة علي الكنبة في الصالة و بتذاكر ل جنة
جنة : مامي شكلك متضايقة كدا انا خلاص خلصت الهوم ورك ايه رأيك اقولك نكت تضحكك
بوسي : لا بليز خليها لما اصحي
جنة بعصبية : لا يا مامي لازم تسمعي النكت
بوسي : ماشي يا حبيبتي قولي
جنة : مرة واحد بواب محشش قاعد قدام العمارة جاله واحد بيساله ابني تايه مشفتوش
البواب قاله تعالي معايا
الراجل قاله: ع فين
ف البواب فتح الاسانسير وطلعوا آخر دور
قام الراجل قالو: ياعم ابني معاك؟
البواب : بس امشي وانت ساكت
بوسي بتضحك
جنة : لا لسة مخلصتش
بوسي : دي قصة ولا نكتة خلصي طيب
جنة : قام الراجل طلع السطوح مع البواب راح
البواب قاله اقف ع آخر السور شايف الناس كلها اللي تحت دي
الراجل قالو ايوة ياعم ابني فين؟
البواب رد عليه و قالو يعني انت سايب الناس دي كلها وجاي تسألني انا
بوسي سكتت لحظات
جنة : انتي مش بتضحكي ليه
بوسي : هي خلصت
جنة: اه انتي مفهمتيهاش
بوسي : لالا فهمتها فهمتها ههههههههههههههه
جنة ::طب فهمتي ايه
بوسي : فهمتها يا جنة عايزة انام بقا
جنة : لا مش عجبتك هقولك واحدة كمان
بوسي : اووف قولي
جنة: مرة اخطبوط واخطبوطة طالعين يتمشوا , راح الأخطبوط قالها هاتي ايدك هاتي ايدك هاتي ايدك هاتي ايدك هاتي ايدك هاتي ايدك هاتي ايدك هاتي ايدك
بوسي : ايوة و بعدين واديتله ايدها يعني ولا لسه بتفكر كل ده
جنة : عشان عندها ايدين كتيير يا مامي
بوسي : اه حلوة يا حبيبتي
جنة : مره واحد خياط خطب خياطه و فرحهم القميص الجاى … و مره واحد جاب شعره ع جنب عشان كان عاوزه ف موضوع
بوسي : تن تراااراا تن تن انتي بتتفرجي ع الخليل كوميدي
جنة بغضب : هي النكت مش عجبتك
بوسي : لا حلوة يا حبيبتي جدا بس عايزة انام
_______________
بعد يومين
الدكتور :انا للاسف مبعملش العمليات دي
ايسل : بس في الحالة دي لازم تعملها معلش يا دكتور احنا اتكلمنا قبل كدا
الدكتور : لولا اني عارف سيف و فهمني أن الموضوع ده مهم جدا مكنتش وافقت… تمام جاهزة يا منار
منار دموعها بتنزل منها و خايفة : اه جاهزة هو العملية دي صعبة يا دكتور
الدكتور : لا ان شاء الله هتعدي اتفضلي الممرضة هتجهزك جوة للعملية
دخلت منار غرفة العمليات
الدكتور : مدام ايسل انا مش هخبي عليكي بس العملية دي صعبة خصوصا ان هي مش قوية و باين عليها بتخاف من العمليات ادعيلها تقوم بالسلامة
ايسل : ربنا يستر
دخل الدكتور يبدأ يشتغل منار ندهت علي ايسل
منار : انا كنت عايزاكي معايا عشان خايفة اوي متمشيش و تسيبيني و كنت عايزاكي تعرفي ان انا عملت كدا غصب عني
ايسل : بس اهدي خالص عشان العملية تعدي ع خير انا برة هستناكي
خرجت ايسل و وقفت خلف الباب سمعت صوت بكاء منار و خوفها خافت يحصلها حاجة قررت تحط نفسها في أصعب اختبار ممكن يحصل دخلت فجأة للدكتور
ايسل : لو سمحت وقف اي حاجة بتعملها
الدكتور : ايه
منار : انتي بتعملي ايه
ايسل : هخليه يتجوزك قومي
_______________
عاصم و ايسل في مطعم
عاصم : انا لو اتجوزت منار زي ما انتي عايزة هخسرك ولو متجوزتهاش برضو هخسرك انتي كدا كدا مش عايزة تسامحيني
ايسل : مش هينفع تاخد كل حاجة يا عاصم لازم حد فينا يخسر حاجة
عاصم : انا … ايسل انتي لو معايا اي مشكلة
هتتحل
ايسل : بس دي مشكلة يا عاصم دي مصيبة و اللي في بطنها ده ابنك عشان كدا احنا لازم نسيب بعض
عاصم : هموت
ايسل : مانا قدامك كنت بتسيبني و مش بموت و كل مرة بفتكر اني هموت بس بكمل
عاصم : مش هقدر اسيبك
ايسل : يبقي تتجوزها
عاصم : انتي بتهزري
ايسل : لا يا عاصم تتجوزها 3 شهور بس
عاصم : ده علي جثتي
ايسل : لو متجوزتهاش يبقي تطلقني
عاصم : متمسكنيش من أيدي اللي بتوجعني
ايسل : يبقي تتجوزها يا عاصم 3 شهور بس
عاصم : يعني لو اتجوزتها هتفضلي معايا ولا بعد 3 شهور هتسيبيني
ايسل سكتت لحظات : مش عارفة
عاصم :خلاص يبقا مش هتجوزها
ايسل : خلاص يا عاصم هفضل معاك
عاصم : 3 شهور بس يا ايسل
ايسل : 3 شهور بس
عاصم : بس انا مكنتش عايز البيبي ده انا مش عايز عيال غير منك
ايسل : الطفل مالوش ذنب اللي غلط يتحمل نتيجة غلطه انا لازم امشي هكلم منار و اقولها تقول ل مامتها
_______________
في مكتب سيف
ايسل :حطيت نفسي في اصعب امتحان في حياتي خايفة اشيل ذنبها لو جرالها حاجة انا زعلانة من الدنيا اللي كنت فاكرة هتصالحني بيه و هتفضل حياتنا حلوة و هيفضل ليا لوحدي لا و كمان هيكون عنده ابن منها يا سيف عارف مشكلتي ايه
سيف : ايه
ايسل :اني لسة بحبه و مش هقدر احب حد غيره
سيف : انتي ازاي رفضتي تعمل العملية دي ما هي كدا كدا غلطت تتحمل نتيجة غلطها
ايسل : مقدرتش يا سيف دي كانت في يوم من الايام صاحبتي خوفت لان محدش واقف معاها خوفت تعمل حاجة في نفسها قررت اروح معاها و لما الدكتور قال ان العملية دي خطر عليها مقدرتش لقيت نفسه بقوله وقف يا دكتور اي حاجة بتعملها
_______________
مالك بعصبية : لازم اعرف انتي رفضتي ليه
منار : عشان مينفعش يا مالك
مالك :أيوة مينفعش ليه انا عملت ايه يعني زعلتك في حاجة فيا حاجة وحشة حصلت قوليلي يا منار
منار : انت تتمناك 1000 بنت
مالك : انا مش عايز الالف دول انا عايزك انتي
منار : ياريت كان ينفع مش لازم تعرف ليه و متحاولش لاني مش هقدر اقولك بعد اذنك انا لازم امشي
مالك : خليكي فاكرة ان انتي اللي بعتيني
_______________
روان قاعدة مع شادي في كافيه بيتكلموا في الشغل و هو خارج بيسلم عليها بيقبلها من خدها لكن روان صدته و بعدت قبل ما يقبلها
شادي : ايه يا بنتي
روان : ايه اللي انت كنت هتعمله ده
شادي : فيها ايه يعني بسلم عليكي و بعدين دي بوسة بريئة
روان : لا مش بريئة ايه ده عمرو ايه اللي جابو هنا انا لازم امشي عن اذنك
شادي : طيب انا كدا كدا ماشي باي
خرج شادي من الكافيه و عمرو وقف لحظات و خرج و روان خلفه
روان : عمرو عمرو استني
عمرو : نعم
روان : عمرو هو كان هيبوسني فعلا بس ولله انا زقيته
عمرو : اه مانا عارف طب كويس انك زقتيه ولله
روان : انت زعلت
عمرو بيفتح موبايله و فتح صفحة شادي كان عليه صور اخر سيشن : عملتي اللي في دماغك و اشتغلتي موديل
روان : انا كنت هقولك بس
عمرو بعصبية : بس ايه كنتي مستنية لما اتفاجأ من واحد صاحبي مش دي خطيبتك اللي صورها نازلة ع بيدج شادي خاطر مش اتفقتي معايا ان مفيش شغل هيتعمل لكن لا ماشاء الله حضرتك خططتي و نفذتي كل حاجة و كأن الحمار اللي المفروض خطيبك اخر من يعلم
روان : عمرو انا اسفة انا عارفة ان انت متضايق بس انت مكنتش هتوافق
عمرو بعصبية :انتي إنسانة أنانية … شايفة نفسك طول الوقت الضحية وانا اللي غلطان دايما
روان : عشان انت ضعيف وانا مكنتش عايزة ارتبط بواحد زيك انت مش شبهي يا عمرو دايما عايز البس كويس مضحكش بصوت عالي مهزرش مع ده ولا ده مش بحب النظام بتاعك ده
عمرو بيضحك :مش بقولك أنانية عايزة خطيبك يبقي مز و روش زي عاصم و دمه خفيف زي سيف و صايع و مشهور زي شادي و لو ماخدتيش كل ده يبقي ظلم المهم انتي المهم روان تبقي عايزة ايه و بس و رغم كدا شايفة نفسك مش غلطانة خالص يا روان
روان: ياااه للدرجة دي شايل في قلبك كل ده مكنتش اعرف ان انا زبالة اوي كدا يا عمرو و لما انا كدا فضلت معايا كل ده ازاي مفركشتش الخطوبة كل ده ليه
عمرو : مسبتكيش عشان حبيتك يا روان مفركشتش معاكي من اول غلطة بتعمليها عشان انا راجل لكن مش معني ان انا طيب و ضعيف زي ما بتقولي انك تيجي عليا و تقللي مني و من كرامتي كل مرة كنت بقول لنفسي معلش يا عمرو عشان انت بتحبها صالحها انت يا عمرو احسنلي اني اعيش من غيرك راجل عندي كرامة انا اه ضعيف بس ضعيف بحبي ليكي لكن دلوقتي بقا هثبتلك اني قوي مش ضعيف يا روان
خلع من ايديه الدبلة و وضعها في ايديها
روان دموعها بتنزل منها : عمرو انت بتعمل ايه انا اسفة بص تعالي نفتح صفحة جديدة يا عمرو
عمرو : كفاية يا روان لحد هنا و كفاية انا مش عايز اشوفك تاني ولا اعرفك ولو هتتغيري اتغيري عشان نفسك مش عشاني ولا عشان حد بس خلي بالك من نفسك
روان: عمرو استني يا عمرو
_______________
في قسم شرطة
بوسي واقفة و علي ايديها ابنها و جنبها شخص علي وجهه كدمات و جرح
….. : يا فندم انا كنت ماشي عادي لقيت الست دي داخلة عليا بأخر سرعة و في المخالف كمان يا باشا و كسرتلي شاشة الموبايل كمان بسببها
الضابط :خلاص اهدي يابني انتي كنتي ماشية من انهي اتجاه يا مدام
بوسي : يا فندم انا كنت خارجة من عيادة الدكتور عشان كنت بكشف علي ابني و بعدين مشيت عادي لقيت الأستاذ ده قدامي
الضابط : دخلتي الشارع ده يمين ولا شمال
…. : شوفت يا باشا اهي هي اللي غلطانة داخلة في المخالف
الضابط : فعلا انتي كنتي داخلة مخالف
بوسي : يا فندم وانا داخلة الشارع مكنش فيه اي حاجة مكتوب عليها ممنوع الدخول ولا مخالف
الضابط : يا هانم الممنوع مش بيتحطله كلمة حضرتك بتلاقي يافطة عليها علامة اكس دي معناها ممنوع الدخول انتي معاكي رخصة سواقة اصلا
بوسي خرجت من شنطتها الرخصة و بتناولها للضابط : ايوة يا فندم معايا رخصة لسة مستلماها من 4 أيام اصلها لسة جديدة
الضابط : طيب اتفضلي استريحي
بوسي: لا ميرسي يا فندم استريح ليه هو انا هتضايف انا جوزي زمانه راجع من الشغل و يدوب اروح اعمله الغدا
الضابط: لا ياريت تتصلي بيه يجيلك علي هنا لاننا لسة هنفتح محضر و الراجل الغلبان ده هيروح المستشفى يتكشف عليه بمعني اصح حضرتك عاملة مصيبة
بوسي بدهشة: انا عاملة مصيبة
الضابط بسخرية : طبعا مش فيه مخالفة مرور و إصابة خطأ ده غير طبعا تليفون الراجل اللي اتدغدغ اتفضلي استريحي حتي عشان الولد اللي انتي شايلاه ده
_______________
سميرة بعصبية : ماهو انا لازم افهم يعني ايه واحدة ترفض دكتور متقدملها و شاب زي الفل و تتجوز واحد متجوز و ياريت اي واحدة لا دي صاحبتها انا حاسة اني هتجنن في ايه
منار : مفيش يا ماما انا مش عايزة اتجوز مالك
سميرة : مالو ايه العيب اللي فيه قوليلي لا و عايزة تتجوزي عاصم ابن مختار اوعي يكون عايزة تتجوزيه عشان حوار الانتقام و انك بالطريقة دي هتاخدي حقك لا انسي تبقي غبية و غبية اوي … الواد ده تنسيه خالص و انا هكلمه بكرة اقوله اني رفضت لا تكلميه ولا يكلمك فاهمة
منار : عشان خاطري يا ماما وافقي عليه مينفعش
سميرة : نعم ياختي يعني ايه مينفعش
منار دموعها بتنزل منها : مينفعش موافقش عليه ولا اتجوزه
سميرة : مش فاهمة
منار بتوتر : انا محتاجاله
سميرة :يعني ايه محتاجاله
منار سكتت لحظات و بتبكي
سميرة بقلق: يعني ايه محتاجاله يا منار … اوعي اوعي تكوني
منار هزت رأسها ب اه
سميرة بابتسامة : انتي بتقولي كدا عشان تتجوزيه و تاخدي الفلوس صح
منار هزت رأسها بالنفي
سميرة : يابن الكلب
قربت من منار و وقفت أمامها و شدت شعرها و صفعتها بقوة علي وجهها : يعني يعني ايه …. يعني ضحك عليكي
منار بتصرخ: اااااه … اااااه
سميرة بعصبية حدفتها علي السرير و بتضربها : يعني ايه ردي …. يا نهار اسود
و بتضرب نفسها بالقلم و بعصبية : يا نهار اسود يا نهار اسود بعتي نفسك يا وسخة يا بنت الكلب
منار بتصرخ من ضربها
سميرة : ده انتي لسة مطلعتيش من البيضة … ده انتي حتة عيلة
منار بتصرخ : ااااه
سميرة : ابوكي كان لازم يموتك يا بنت الكلب يا نهار اسود
سميرة سندت رأسها و هي مش قادرة تمسك نفسها و تقعد وقفت جنب الحائط و سندت رأسها و وقعت علي الارض
سميرة : لا لا هو مش كلب هو ميستاهلش اشتمه ده كان مفيش زيه كان يستاهل ايه عشان تحطي رأسه في الأرض …. لا لا
منار قربت منها و بتحاول تهديها
سميرة بصراخ: لا ابعدي عني ابعدي عني … اخص عليكي ليه ليه عملتي كدا … انا عملتلك ايه عشان تعملي فيا كدا …
ضربتها برجلها علي جسمها و بتحاول تبعدها عنها
سميرة : ليه يا واطية يا سافلة حرام عليكي
منار فقدت الوعي في اللحظة دي من العنف و الضرب
رأيكم ؟؟ لو التفاعل عدي 200 لايك و كومنت زي الأول هكتب 22 بسرعة
سميرة ممكن هتوافق ع جواز منار من عاصم ؟ و روان هتستمر في شغلها مع شادي ولا هتسيبه؟