ازاي تتخلصي من ملمس الجلد الغير موحد بطرق طبيعية
مع التقدم في العمر والتعرض لعوامل الجو المختلفة ممكن بعض المسام في البشرة توسع, ويتراكم فيها التراب والجلد والميت والزهم, وده بيخلي نسيج الجلد في المناطق دي مختلف ومش متساوي مع باقي البشرة, وده اكيد بيدي مظهر مش حلو, عشان كده النهاردة من خلال موضوعنا هنقولك على وصفات طبيعية لعلاج ملمس الجلد الغير موحد.
وصفات لعلاج ملمس الجلد الغير موحد:
1- وصفة السكر وبياض البيض:
البروتين اللي موجود في البيض لما بيمتزج مع السكر, بيعملوا خليط فعال جدا في تقشير الجلد وعلاج مشكلة ملمس الجلد الغير موحد.
المكونات:
بياض بيضة.
2 معلقة كبيرة سكر.
الطريقة:
1- في طبق اخلطي بياض البيض مع السكر, لحد ما يتكون خليط سميك.
2- بفرشة او بايدك حطي الخليط على الوش والرقبة, دلكي الخليط على البشرة في حركات دائرية لمدة 5 دقايق.
3- سيبي الخليط على بشرتك لمدة 30 دقيقة, او لحد ما ينشف.
4- اغسلي بشرتك بمية دافية, ونشفيها ورطبيها بكريم مرطب خفيف.
5- كرري الوصفة من 2 – 3 مرات في الاسبوع لافضل النتايج.
2- وصفة عصير الليمون والملح:
الليمون مصدر غني جدا بفيتامين C, وبيستخدم كعامل لتفتيح البشرة, وده بيخليه علاج فعال جدا لملمس الجلد الغير موحد, والملح مقشر طبيعي للبشرة.
المكونات:
2 معلقة كبيرة عصير ليمون.
2 معلقة كبيرة ملح.
الطريقة:
1- في طبق صغير اخلطي الملح مع عصير الليمون.
2- حطي الخليط على البشرة, ودلكي بيه البشرة في حركات دائرية باطراف صوابعك لمدة دقايق.
3- سيبيه على البشرة من 10 – 15 دقيقة لحد ما ينشف, وبعدها اغسلي بشرتك بمية دافية.
4- ممكن تستخدمي الوصفة دي يوم ويوم لحد ما توصلي للنتيجة اللي انتي عايزاها.
3- وصفة الطين ومية الورد:
الطين من المكونات اللي بتستخدم لعلاج كتير من مشاكل الجلد في الهند, وواحد من العلاجات اللي بتساعد على علاج ملمس الجلد الغير موحد وبيدي توهج طبيعي للبشرة.
المكونات:
من 3 – 4 معالق كبيرة مية ورد.
2 معلقة كبيرة طين.
الطريقة:
1- في طبق صغير اخلطي الطين مع مية ورد, لحد ما يتكون خليط سميك.
2- اغسلي وشك بمية دافية عشان تفتحي مسام البشرة, وبعدها حطي الخليط على بشرتك, واتأكدي انك تحطي طبقة متساوية على الوش كله.
3- سيبي الخلط لمدة نص ساعة لحد ما ينشف خالص, وبعدها اغسلي بشرتك بمية فاترة, ونشفيها وادهني كريم مرطب خفيف.
4- كرري الوصفة من 2 – 3 مرات في الاسبوع لافضل النتايج.